AGROSANOAT MAJMUASINI RIVOJLANTIRISHNING IQTISODIY MEXANIZMLARI

Abstract

Agrosanoat majmuasi mamlakat iqtisodiyoti rivojida hal qiluvchi ahamiyatga ega bo‘lgan strategik sohalardan biridir. Chunki u nafaqat aholini oziq-ovqat mahsulotlari bilan ta’minlash, balki xalqaro bozorlarda mamlakatning raqobatbardoshligini oshirish, eksport salohiyatini kengaytirish va qishloq hududlarida ijtimoiy barqarorlikni mustahkamlashga ham xizmat qiladi. Shu sababli agrosanoat majmuasini rivojlantirish masalasi har doim davlat siyosatining markazida bo‘lib kelmoqda. Bozor iqtisodiyotiga o‘tish jarayonida qishloq xo‘jaligi va uni qayta ishlash sohalarida muayyan o‘zgarishlar amalga oshirildi. Ammo dunyo bozorida oziq-ovqat xavfsizligi bilan bog‘liq muammolar, iqlim o‘zgarishi, suv resurslaridan oqilona foydalanish zarurati va aholining tezkor o‘sishi yangi talab va vazifalarni yuzaga chiqarmoqda. Bunday sharoitda agrosanoat majmuasini zamonaviy iqtisodiy mexanizmlar asosida rivojlantirish zaruriyati yanada ortmoqda. Agrosanoat majmuasi ko‘p tarmoqli tizim bo‘lib, u qishloq xo‘jaligi ishlab chiqarishini, uni qayta ishlash sanoatini, transport-logistika tizimini, saqlash va realizatsiya qilish mexanizmlarini o‘z ichiga oladi.